الأصدقاء يتذكرون كريستين .. في عيد ميلادها الثاني والعشرين .

بعد أن إحتفلت وحدي بعيد ميلادها .. الأصدقاء يحتفلون معي بذكري ميلادها .

الأصدقاء يتذكرون كريستين .. في عيد ميلادها الثاني والعشرين .

....
Mahmoud Abdelhay

بحبك ...مش أكتر من كدة

....
Kofi Kotga

كريسي .. فاكر صوتك و كلامك ونصايحك ليا , عمري محنساكي ولا حشيل رقمك ومستني اشوفه على شاشة الموبيل عشان اجري على مكان فيه شبكة وارد عليكي , واحشاني ومش حنساكي ابدا .. كل سنة ونتي طيبة

....
Manal Ahmed Sliem

كوكى ..... وحشتينى بجد , الكلام ليكى او تنك مايعبرش عن حاجه من اللى جوايا , وانتى من الناس اللى محتاجين حد يتكلم عنهم , انتى حبك جوانا بيظهر على ملامحنا, محدش بينساكى بجد ابدا
كل سنه وذكراكى تغير فينا

....
Asser Mostafa

البنت اللي أول مرة سمعت صوتها مصدقتش إنها اكبر مني
و أول مرة شفت شكلها مصدقتش إنها حلوة قوي كدة
و لما سمعت ضحكتها بقيت بكلمها كل شوية و اهزر معاها قاصد عشان أسمع ضحكتها تاني
البنت اللي مع إني مقابلتهاش ولا مرة بس كنت دايما بحس إنها صاحبتي من زمان
كرستين اللي مشفتش حد زعلان منها

....
" كريستين وهيا صغيرة "
....
Tab Leeh
انها الساعه 12.10
صباحا في يوم الجمعه
كانت هذه اخر مره احدثها فيها
عبر احدي برامج المحادثه الشهيره
ابتدئ الكلام بالسلام و ببعض من العتاب بين الاصدقاء
حيث كنت معتاد منها ان تتحدث معي ولكن مرت بضعه ايام دون ان تحاول السؤال عني وكنت حينها اعاني من تعكر المزاج قليلا
وبعد انا تكلمت معها قليلا و وعدتها بالاتصال لاحقا
سألتني بابا طبطب : انت ليه بتهاجم الثوار ؟
اجبتها باني لا اهاجم احدا ...انا انتقد فقط ما لا اراه صحيحا ..
فانا تعودت الا اتبع القطيع !
ولكن اجابتي لم تصل !! ابدا
لقد انقطع الانترنت
وظننت انها مشكله مؤقته وسيعود الانترنت مره اخري
لاكتشف بعدها ان كافه وسائل الاتصال مقطوعه !
وهنا تسرب القلق بداخلي لاول مره
يبدو ان جمعة الغد لن تكون كغيرها من الجمع

مرت الايام و لازالت وسائل الاتصال مقطوعه
-------------------------------
انه يوم الثلاثاء الشهير
وبعد الخطاب الذي القاه الرئيس
حدث ما توقعته
عوده وسائل الاتصال للحياه !
في فجر الاربعاء عاد الانترنت و المحمول للعمل مره اخري
الفرحه تغمرني...ساستطيع الاتصال باصدقائي وبمن اهتم بامرهم مرة احري
وكما وعدتها اتصلت عليها ولا يرد احد
اكرر اتصالاتي علي هاتفها النقال ولا مجيب
مغلق كعادته !
اذهب الي (الوول) الخاص ببروفايل كريستين
لاداعبها وامازحها كعادتي
وهنا اكتشف الخبر الاليم

لقد عادت وسائل الاتصال للحياه
وفقدت صديقتي حياتها
------------------------------
قد لا تصدقني يا عزيزي ولكن حتي الان افتقدها
احيانا يخطر علي بالي ان اتصل بها
حينها اتذكر انه قد رحلت عنا
(لازالت احتفظ باسمها في هاتفي في قائمه الاتصال)!
انا لست من هواه مدح الاخرين
ولكنها كانت بممن يستمعون اليك جيدا
مهما بدا ان الحديث تافها
كانت تنصت في اهتمام او تتصنعه احيانا
وتقترح عليك الحلول في بغض الاحيان
------------------------------
اعلم انني لن استطيع ان اختزل شخص في بضع كلمات
وادرك دائما وابدا
ان الحزن محله القلب
وان الكلمات والمعاني لا تقدر علي التعبير بما تختزنه الصدور

لذلك فقد ترددت كثيرا في كتابه الاسطر القليله السابقه
ولكني كتبتها من اجل هدف اخر

العمر اقصر مما نتخيل
والموت ياتي بغته
فلا تبخس من تحبهم حقهم
ولا تؤجل كلماتك لهم

نفتقدك كثيرا يا صديقتي :(


....
Michel Magdy

انا مش باعرف اختصر للأسف - انا مكتبتش حاجات كتير وبرضه ا
عرفتها فيسبوكيا من سنه ونص تقريبا ؛ الصراحه مش فاكر مين فينا ضاف التانى ؛ وقت قليل وبعد مجاملات لطيفه وكلها ود بقينا أصحاب ؛ لاحظت انه البت دى عفويه جدا فى رسايلها وكلامها وإن كان حروف زى كل الكلام..لكنه بيطيب وبيمسح على أوجاعى بجد ؛ شويه وبقينا أصحاب أكتر وخدنا نمر تليفونات بعض ؛ ولأنى شحات فكانت هى دايما تتصل وتسأل وتطمن وتطيب ؛ حتى لما سابت بيت أهلها وراحت عند خالتها والمفروض انها محتاجه كل قرش ؛ برضه كانت بتسأل

فى رمضان اللى فات موبينيل كانت عامله عرض انك تتكلم ساعه او ساعتين طول النهار ببلاش (مش فاكر العرض الصراحه) اشتركت فى العرض ده بس علشان أكلم كريستين براحتى ؛ فى أسوأ وأكتر الأيام اللى كنت فيها لوحدى كانت هى أكتر حد بيهون عليا وتقعد تحفزنى وتشجعنى شويه وتعايرنى وتغيظنى شويه بأنه لازم أستحمل زيها (إمال أنت راجل إزاى يا وله) ؛ وانه كل اللى بنحلم بيه هيتحقق بس المسأله مسأله وقت ونتعب شويه ؛ عمرها ما اتكلمت معايا عن حد وقالت عليه كلمه وحشه ؛ بالعكس كريستين دايما كانت تمدح وتشكر فى كل الناس ؛ وكل ما تيجى سيره حد تقولى دى حبيبتى وده أخويا ؛ كانت بتحلم بحاجات كتير جدا وكانت مصرة وواثقه انها هتحققها ؛ لدرجه انى فى عز يأسى كان بيتهيألى انى شايف أحلامنا دى اتحققت من كتر ما أنا مصدق
نبرة صوتها

أكتر حاجة مزعلانى أنى ما قابلتهاش ولا مرة ؛ كنت أتمنى أستمتع بيها وبالقعده معاها وأشوف الضحكه الطفوليه البريئه اللى ما ملوثتهاش الغابة بتاعتنا ؛ مفتقد صوتها جدا ومفتقد شعور انه فى مكان ما من هذا العالم انسان انا ما قابلتوش وبيننا كل هذا الحب وأنا أعلم انه يحبنى عن صدق وبدون أى منفعه من علاقته معايا

كريستين مهما قلت من كلمات مش هتوصف وجعتى فيكى ؛ الله يرحمك يا حبيبتى .

........................................


ذات صلة : النهارده عيد ميلاد البنت اللى أنا بحبها :)

التصنيف :